Caleg Binian

Si Ongol | Sabtu, 28 Juli 2018 - 12:48:45 WIB

Caleg Binian

Bubuhan Ongol wan kakawanannya hari samalam pina heboh pas bamakanan di warung Acil Jablay imbah sambahyang jumahat. Napa pasalnya?  Buhannya ni takajut pas malihat di lawang warung, ada gambar Acil Jablay. Sakalinya sidin ne, diam-diam jadi bakal calon anggota dewan.

”Astagfirullahaziim..! Pian kah ni cil? Rasa kada pinandu ulun nah,” jar Ongol pina takajut sambil maitihi wan foto sidin diposter tadi.

”Yaam pina lain panampilan sidin lawan aslinya, bungas banar nang difoto nih, lawan pina bebentuk awak,” jar Lengkor pulang.

Samantara Acil Jablay nang dikuya buhannya tadi, langsung takarinyum pina kahimungan.

”Yaam mah, lantaran warung ku neh siang malam rami, makanya ada partai nang manjadiakan aku caleg. Supaya cukup, jatah bebinian jar,” sahut sidin menjelasakan.

Kada lawas datang manyusul si Haji Untat. Kujuk-kujuk padang batapih dari masjid. Rupanya sidin ne langsung jua manuju lawang warung, nang ditempeli poster foto Acil Jablay, pakai kebaya, rambut basanggul, lawan gincu tabal di bibir  warna habang banyala. Takajut jua sidin pas malihat poster nang batulisan.

”Mohon doa restu, demi pembangunan di Kampung Liur”,.

”Akuii…poster siapa neh. Pina barasih muha. Bengkeng eh. Janda kah, perawan kah, atau bini urang kah ne?” jar Haji Untat, sambil mamacul kaca mata, maitihi bahimat ka poster tadi.

”Sidin ne janda Ji ai, siapa yu kira-kira,” sahut Ongol men tes sidin.

”Rasa pinandu rasa kada aku nah?,” jar Haji Untat pina panasaran.

Handap kisah, timbul babunyi klepaak..!, kena awak Ongol. ”Akaiii,”….jar Ongol sampat manangkis, tapi kena tangan. Sakalinya Acil Jablay manawak wan sandal, lantaran buhannya tadi pina maulu-ulu lawan foto sidin di poster nitu.

”Uy..jangan tapi mahina lah, jangan paragah kada tahu kada kenal. Bahari siapa nang sampat manyasah..!” jar Acil Jablay manyindir Haji Untat.

”Astaga…! Ikam kah nang mancaleg nih? Hanyaram pinandu aku nah,” sahut Haji Untat pina birai muha. Mudah-mudahan banyak kena nang mamilih, soalnya fotonya nih nah nang malawanakan.

”Foto waktu anum kah?,” jar sidin pulang manyindir.

”Bletaakk..!”

Sandal pulang malayang ditawak Acil Jablay, untung lapas.

”Nitu foto terbaru, kada sagalaan foto bahari pang. Asli nitu memang muha ku sorang..!,” sahut Acil Jablay basasarik mangarasi.

”Cil amun boleh tahu, dimana pian bafoto kyini? Kira-kira barapa upahnya cil. Rasa kapingin jua nah, mambawai bini ulun bafoto gasan dibingkai dipajang di rumah,” jar Ongol umpat batakun.

”Foto ne larangolai, ratusan ribu sakali cetak. Jadi aku bafoto di studio wadah biasa, nang di pasar,” sahut Acil Jablay.

”Akuii….maka biasanya 20 puluh ribu wara salambar, gasan nang ukuran standar.!,” jar Ongol pina takakajut.

”Amun biaya bafoto wan mencetaknya memang 20 ribu wara. Nang larang nitu meeditnya, supaya muhaku mulus wan awakku balangsing pas fotonya dicetak, jadi dua ratus ribu salambar,” sahut Acil Jablay menjelasakan. Napa ada manapak dahi Ongol, Haji Untat wan Lengkor mandangarnya.

”Mendai ja hasilnya cemerlang, beedit behimat sakalinya..!,” garunum Haji Untat. (gus)

0 Komentar

Tulis Komentar

Kolom komentar tersedia untuk diskusi, berbagi ide dan pengetahuan. Hargai pembaca lain dengan berbahasa yang baik dalam berekspresi. Setialah pada topik. Jangan menyerang atau menebar kebencian terhadap suku, agama, ras, atau golongan tertentu. Pikirlah baik-baik sebelum mengirim komentar.

Komentar Facebook