Ngalih Guring

Si Ongol | Kamis, 09 Agustus 2018 - 13:16:09 WIB

Ngalih Guring

Parak parayaan hari kemerdekaan ngini, bubuhan Ongol, Lengkor wan Gabau  handak saban malam takumpulan di pos ronda, lantaran jua umpat lomba main domino nang diadakan Haji Walet. Akibat rancak bagadang, lalu buhannya ne rata-rata baisi panyakit kurang guring.

“Aku saban hari guring malam pasti di atas jam 12an, makanya rancak takalandau bangun,” ujar Lengkor pas mambuka pandiran. “Naah, sama ha wan aku Kor ai, amun barabah kada kawa langsung taguring. Pasti malayang kasana kamari dahulu pikiran. Napa lagi pas baisi utang banyak, pacangan bisa samalaman mamikirakannya,”sahut Gabau pulang.

“Amun aku lain kisah, rancak jua ngalih guring nitu. Tapi imbah awak dikarik biniku lawan balsam, lalu tanyamanam guring,” ujar Ongol mamanasi kawalannya.

Lalu datang Haji Untat ka pos ronda. “Hauu mang haji, tumben pian mancungul malam kyini? Ujar Ongol manyambut sidin. “Yaam nah, kada kawa guring di rumah, tapaksaai mandatangai buhan kam neh,  umpat ba dom,” sahut sidin.

“Amun bulih tahu, kanapa pasalnya Ji, maka pian taumpat ngalih guring nang kaya urang ulun ne. Maka pian rancak sungsung ja guring?” ujar Gabau umpat manakuni.

“Ngini gara-gara aku tadi digarak bini ku bakajut, jadi takalipik tabangun lalu ngalih pulang guring. Lantaran kurang guringam neh, bisa naik tekananku!,”  ujar Haji Untat menjelasakan. “Haah, Pian maigau kah?” jar Lengkor pulang pina panasaran handak tahu. “Ujar biniku, salain maigau aku rancak guring bajalan. Makanya langsung digaraki,” sahut Haji Untat pulang.

Tatawaan buhan Ongol mandangar nang kyitu sakalinya pasal nang maulah Haji Untat tadi sampai takajut digaraki bininya. “Hauu, jangan mahuluti ja buhan kam neh..!,”cuba carii, apa ubat gasan maampihakan maigau lawan guring sambil bajalan…!,” ujar Haji Untat manyareki buhannya nang tatawaan tadi.

“Naah yaam, amun ubat gasan urang ngalih guring banyak pang urang bajual. Tapi amun ubat gasan  urang maigau, apalagi maigau sambil guring bajalan nitu langka banaran,” ujar Gabau kabingungan.

“Ulun tahu ubatnya Ji ai, kena lun tukarakan..!,” ujar Ongol nang tiba-tiba basumangat manyahut. “Naaa..siip tu amunnya ada, 50ribu cukuplah harganya?” sahut Haji Untat sambil manjulung duit ka Ongol. “Inggih cukup Ji ai, hadangi satumat lah lun mancarinya,” ujar Ongol sambil manjumput wan duit tadi, langsung hancap basapeda mancari warung nang masih buka.

Sakira satangah jam mahadangi, datang si Ongol ne sambil manjulung plastik hirang baisi kotak halus ka Haji Untat. “Naah ji ubatnya, nyaman ampih guring sambil bajalan. Di jamin ampuh Ji ai, karena sudah terbukti,” ujar Ongol mayakinakan.

“Hebat jua ikam ne Ngol, banyak tahu wan ubat,” sahut Haji Untat mamuji. Tapi sakalinya pas mambuka wan kotak nang dijulung Ongol tadi, langsung tabincalak mata sidin. “Napa obatnya ngini Ngol..!, maka paku picik nang ikam tukar ne. Apa maksud..haah!,” ujar Haji Untat bamamai pulang.

“Nituam ubatnya Ji ai, jadi amun pian handak taguring pas naik ka ranjang, pian taburi di lantai kamar pian. Lun jamin, pian kada pacangan maigau guring sambil bajalan lagi,” ujar Ongol manyahut.

Sampai sakit parut Lengkor wan Gabau tatawa mandangar jar Ongol tadi, bahancap bajauh buhannya dari pada pacangan umpat dihamuki Haji Untat. Ongol mintu jua, hancap baluncat ma les tawakan sandal Haji Untat nang padang sarek tadi. “Kadanya manulungi buhan kam neh, malah mambungulii..!,” jar Haji Untat bamamai sambil manyumpah. (gus)

 

 

0 Komentar

Tulis Komentar

Kolom komentar tersedia untuk diskusi, berbagi ide dan pengetahuan. Hargai pembaca lain dengan berbahasa yang baik dalam berekspresi. Setialah pada topik. Jangan menyerang atau menebar kebencian terhadap suku, agama, ras, atau golongan tertentu. Pikirlah baik-baik sebelum mengirim komentar.

Komentar Facebook