Kada Halal

Si Ongol | Jumat, 10 Agustus 2018 - 13:20:07 WIB

Kada Halal

Pas mawarung di wadah Acil Jablay sungsung kamarian, Ongol wan kakawanannya yakni si Anang Gabau, Lengkor sagalaan Haji Walet rami mambahas bubuhan kakanakan pelajar nang lagi rami di suntik vaksin. Diantara buhannya ne rupanya pro kontra jua, ada nang maanggap basuntik nitu balum halal ubatnya, ada jua nang sudah manyambat halal.

”Kyapa anak ikam Ngol, ada jua lah disuntik urang di sakulahan?,” jar Haji Walet batakun lawan Ongol, sambil mambaca koran. ”Hah, kada tahu ulun Ji? Kadida pang gurunya bapadah, amun akan ulun pacangan di suntik,” sahut Ongol, nang anaknya duduk di kelas 6 SD.

”Nah iyaam, ikam ne tatinggalan berita Ngolai. Wayahini kakanakan sakolah  rami disuntik urang vaksin, nyaman pas ganal kena kada kena panyakit,” jar Gabau pulang. Hancap Ongol malihat beritanya di koran nang diingkut Haji Walet tadi. ”Nah, sakalinya ubat nang disuntik nitu, kadida tulisan halalnya,” jar Ongol mananggapi. ”Babaik anak ikam sudah disuntik urang di sakulahan Ngol? Baiknyai ikam janguki ka sana,” ujar Lengkor pulang manyaranakan.

Handap kisah, Ongol langsung ja manuju sakulahan anaknya nangarannya si Utuh Lantui. Didatanginya ke kelas anaknya  nitu, nang pas tabalujur lagi ada petugas nang datang handak manyuntik vaksin.

”Hau..hau…bu guru, ada apa ini, maka banyak dokter datangan. Ada panyuntikan vaksin kah?,” jar Ongol langsung mandatangi guru anaknya di dalam kelas. Takakajut nang guru tadi malihat Ongol tiba-tiba muncul. ”Eh, inggih pak ai, ini ada petugas datang manyuntik vaksin. Program pamarintah,” jar guru menjelasakan lawan Ongol.

”Hadang dahulu, anakku kada usah disuntik paan. Soalnya aku sabagai urang tuhanya masih ragu, apakah ubat nitu halal kah kada? ,” sahut Ongol pulang, langsung minta izin mambawa Utuh Lantui bulik badahulu. ”Kanapa ulun kada boleh basuntik bah, padahal ulun kada takutan paan lawan jarum..!,” jar Utuh manakuni abahnya. ”Anu nak-ai, ini masih kada jelas ubatnya. Kadida tulisan halalnya. Bisa badosa amun kita mamakainya,” jar Ongol pas di jalan mamadahi anaknya.

Sabalum bulik ka rumah, Ongol ne tadi mambawai anaknya makanan di warung Acil Jablay. ”Handak makan atau minum apa ikam nak, pesan ja.! Tu nah, ada wadai untuk-untuk, donat, lampar, sagalaan apam, atau nasi kuning kah?,” jar Ongol manawai anaknya, di hadapan Acil Jablay.

”Makanan Acil ne dijamin sehat dingai, kada pakai pangawet. Asli ulahan urang kampung kita surang,” jar Acil Jablay umpat manawari Utuh Lantui. Tapi tatap ja si Utuh ne hinip kada manyahut, baya manggatil lawan maitihi ja makanan nang ditawarakan tadi.

”Kada paan bah ai, ulun kada mamakan wan wadai sagalaan nasi kuning neh, soalnya kadida tulisan halalnya.!. Maka pian jua nang bapadah tadi, amun kadada tanda halalnya, jangan dimakan, bisa badosa.!,” jar Utuh menjelaskan, maka padang didangarakan pembeli nang lain pulang.

Napa ada, takalipik Ongol mandangarnya. Maginnya lagi Acil Jablay, langsung sidin marasa tasinggung. ”Ikam lajari napa anak ikam Ngol? Maka manyambat makanan di warung ku ne kada halal..!,” jar sidin bamamai. Ongol maka, birai muhanya, supan-supan menjelasakan lawan Acil Jablay duduk perkara kisahnya, sabalum Utuh tadi dibawai mawarung. (gus)

 

0 Komentar

Tulis Komentar

Kolom komentar tersedia untuk diskusi, berbagi ide dan pengetahuan. Hargai pembaca lain dengan berbahasa yang baik dalam berekspresi. Setialah pada topik. Jangan menyerang atau menebar kebencian terhadap suku, agama, ras, atau golongan tertentu. Pikirlah baik-baik sebelum mengirim komentar.

Komentar Facebook